Psa 17 | NdeIBE | STEP | Umkhuleko kaDavida Zwana, O Jehova, ukuncenga kwami okulungileyo; lalela ukukhala kwami. Beka indlebe yakho emkhulekweni wami

Psalms 17

Umkhuleko kaDavida

1 Zwana, O Jehova, ukuncenga kwami okulungileyo; lalela ukukhala kwami. Beka indlebe yakho emkhulekweni wami – kawusuki ezindebeni ezikhohlisayo.

2 Sengathi kungavela kuwe ukugezwa kwami ecaleni; sengathi amehlo akho angabona lokho okuqondileyo.

3 Loba ungaze udungulule inhliziyo yami ungihlole ebusuku, loba ungilinga, kawuyikufumana lutho; sengizimisele ukuthi umlomo wami ungenzi isono.

4 Mayelana lezenzo zabantu mina ngizazithiba ezindleleni zobudlwangudlwangu ngelizwi lezindebe zakho;

5 Izinyathelo zami zalela ezindleleni zakho; izinyawo zami kazizange zitshelele.

6 Ngikhala kuwe, O Nkulunkulu ngokuba uzangiphendula; ake ungilalele uzwe umthandazo wami.

7 Tshengisa ukumangalisa kothando lwakho olukhulu, wena osindisa ngesandla sakho sokunene labo ababalekela kuwe ezitheni zabo.

8 Ngilondoloza njengegugu lakho; ngifihla ethunzini lamaphiko akho,

9 kwababi abangihlaselayo, ezitheni zami ezimbi ezingihanqileyo.

10 Bagcika izinhliziyo zabo ezingelazwelo, lemilomo yabo ikhuluma iqholoza.

11 Sebeze bangithola, manje sebengihanqile bangiqhuzulele amehlo bafuna ukungilahla phansi.

12 Banjengesilwane silambele loba yini esingayidumela, njengenkunzi yesilwane siquthile sicatshile.

13 Vuka, O Jehova, basukele, balahle phansi; ngilamulela kwababi ngenkemba yakho.

14 O Jehova, ngisindisa ngesandla sakho ebantwini abanjalo, ebantwini bakulumhlaba omvuzo wabo ukuyonale impilo. Udedisa iphango lalabo obathandayo; amadodana abo akhomba ngophakathi; baqoqela abantwababo inotho.

15 Mina-ke ngenxa yokulunga ngizabubona ubuso bakho; ngizakuthi ekuvukeni kwami nganeliswe yikubona isimo sakho.